VPS Nədir ?

VDS (Virtual Dedicated Server) və ya VPS (Virtual Private Server) — bu müştərinin istifadəsinə verilən maksimum hüquqlara malik virtual server xidmətidir. VPS və ya VDS real fiziki serverin fəaliyyətini emulasiya edir – müştəri root hüquqlara malikdir, istədiyi əməliyyat sistemini və proqram təminatını quraşdıra bilir. Bir fiziki serverdə adətən bir neçə müstəqil virtual serverlər yerləşir.

VPS və VDS server arasındakı fərq nədir?
Bunlar arasında heç bir fərq yoxdur. Virtual Private Server və Virtual Dedicated Server eyni anlamı daşıyan və eyni iş fəaliyyətini görən fərqli terminlərdir.

Virtual serverin iş prinsipi və xüsusiyyətləri
İş prinsipi və funksional xüsusiyyətlərinə görə virtual server fiziki serverdən çox az fərqlənir. O sayt, məlumat bazası, domen, ssh, ftp, e-poçt istifadəçilərinin yerləşdirməsilə bağlı məhdudiyyətə malik deyil. İnzibatçı bu parametrlər üzərində tam hüquqlara malikdir. İstənilən proqram təminatı real fiziki serverdə olduğu kimi quraşdırıla, dəyişdirilə və ya əvəz edilə bilər. Bizim serverlərdə yerləşən hər bir virtual server özünün IP-ünvanına malikdir və bu ünvan yalnız ayrılmış serverə məxsusdur. Ehtiyac olduqda əlavə IP sifariş etmək olur.

Virtual server host-maşında yerləşən digərlərindən tam müstəqilliyə malikdir. Bu o deməkdir ki, “qonşularda” baş vermiş xəta çalışan serverə heç bir təsiri olmur.

VPS/VDS-in veb-hostinqlə (shared) müqayisəsi

Virtual serverin veb-hostinqlə müqayisədə üstünlükləri:

• Tam idarəetmə: virtual serverin sahibləri root (UNIX üçün) və ya Administrator (Windows üçün) səviyyəsində hüquqlara malik olur və konkret layihə tələblərinə uyğun istənilən proqram təminatı və əməliyyat sistemini quraşdıra bilir. Serverin ayarlanması tam olaraq inzibatçıdan asılıdır.
• Minimal məhdudiyyət: sayt, məlumat bazası, domen, ssh, ftp və e-poçt istifadəçiləri yalnız serverin öz resursları səviyyəsində məhdudiyyətə malikdir.
• Müstəqillik: host-maşında yerləşən digər virtual serverlər – “qonşular” bir-birindən təcrid olunub və iş fəaliyyəti zamanı bir-birindən resurs çəkmir. Həmçinin veb-hostinqdən fərqli olaraq özünə məxsus IP-ünvanına malikdirlər.

Virtual serverin veb-hostinqlə müqayisədə mənfi cəhətləri:

• Qiymət: virtual serverin qiyməti adətən veb-hostinqdən daha yüksək olur. Ancaq biz çalışırıq ki, bu fərqi  getdikcə daha da minimuma endirək.
• İnzibatçılığa ehtiyac: virtual serverin idarəetməsi fiziki serverin inzibatçılığı ilə eynidir. Bu üzdən istifadəçiyə server inzibatçılığı sahəsində müəyyən bilik və bacarıqlara malik olmaq lazımdır. Ancaq bu baryeri aşmaq üçün idarə panelləri mövcuddur. Onlar tipik vəzifələrin öhdəsindən yaxşı gəlir. Öz müştərilərimiz üçün biz ISPmanager 5 Lite idarəetmə panelini təklif edirik.